Kryetari i bashkisë së Rrogozhinës, Edison Memolla ka reaguar për herë të parë mesditën e sotme, pas dënimit nga GJKKO me 1 vit burg
Përmes një shkrimi në rrjetet sociale, Memolla shkruan se vendimin do ta apelojë, pasi nuk është i mbështetur në prova dhe fakte.
Kryebashkiaku socialist thekson se deri në një vendim të formës së prerë, do të vazhdojë të jetë kryetar i bashkisë Rrogozhinë.
Postimi i plotë:
Që kur mu besua detyra e përfaqësuesit të popullit tim, kam qenë në dijeni për peshën që do sillte në çdo dimension të sajin.
Drejtësinë e Re e kam mbështetur fuqimisht dhe si rrjedhojë jam i hapur të pranoj çfarëdolloj vendimi të dhënë kundrejt meje, por kjo nuk më pengon të apeloj një vendim i cili nuk është i mbështetur aspak në prova dhe fakte.
Theksoj se deri në një vendim të formës së prerë e më tej, unë jam kryetar i bashkisë Rrogozhinë, në krye të detyrës dhe i vetdijshëm për të gjitha përgjegjësitë që ky post sjell.
Së fundmi, ju falenderoj nga zemra të gjithë ju që keni qenë pranë meje duke më njohur, mbështetur si njeri, duke besuar të vërtetën time të pafajshme dhe s’më keni kthyer shpinën edhe kur situata duket e vështirë.
