Policia dhe Prokuroria e Tiranës kanë ndaluar Mirvjen Ninon pasi u denoncua nga emisioni Stop në Tv Klan se mashtronte qytetarët për t’i pajisur me dokumente angleze kundrejt pagesave monetare.
Prokuroria e Tiranës njofton zyrtarisht se Mirvjen Nino u ndalua për akuzat e falsifikimit të dokumenteve, mashtrimit dhe ndihma për kalim të paligjshëm të kufijve.
“Pas këtij momenti dhe komunikimit me gazetarët e Emisionit Investigativ Stop, u administruan pamjet filmike, u kontaktuan qytetarët duke marrë kallëzimet përkatëse dhe u ndalua shtetasi, M. N., si person i dyshuar për veprat penale “Mashtrimi” dhe “Ndihma për Kalim të paligjshëm të kufijëve” parashikuar nga neni 143/3 dhe 298/3 i K.Penal”, thuhet në njoftimin e Prokurorisë së Tiranës.
Emisioni Stop denoncoi se Mirvjen Nino nga Berati mashtroi një qytetar nga Fieri që jeton në Angli prej disa vitesh pa dokumente, duke i premtuar do t’i bënte letrat angleze nëpërmjet një martese false duke paguar 30 mijë Paund, por në fakt rezultoi se ishte rast mashtrimi.
Personi i interesuar për dokumentet kërkoi paratë mbrapsht, por Mirvjen Nino përdor skemën e kallëzimit në zyrën e emigracionit për të gjithë ata që kërkonin lekët mbrapsht, pasi nuk ishte kryer procedura.
