Durim Toska, ish-drejtori i burgut të Fushë-Krujës ka dalë sot para gjykatës për t’u njohur me masën e sigurisë.
Mësohet se Gjykata e Korçës ka lënë në burg ish drejtorin e Burgut të Fushë Krujës, i cili tre ditë më parë u arrestua në flagrancë në Pogradec për dhunë ndaj gruas së tij dhe armëmbajtje pa leje.
Gjatë kontrollit policor të ushtruar në banesën e tij policia gjeti edhe armë zjarri me municion të cilën 52 vjeçari e posedonte pa lejë.
Arrestimi i Toskës u njoftua 1 orë pasi zyra e shtypit e Ministrisë së Drejtësisë informoi për shkarkimin e Toskës nga posti i Drejtorit të Institucionit të Ekzekutimit të Veprave Penale në Fushë Krujë.
Në njoftim thuhej se ministri i Drejtësisë, Ulsi Manja kishte ndërmarrë këtë hap pas propozimit të Drejtorit të Përgjithshëm të Burgjeve, duke e bazuar vendimin në kritere etike dhe ligjore të cenuara nga Durim Toska.
