Këshilli i Lartë i Prokurorisë pezullon nga detyra kryeprokurorin e Kukësit Xhevahir Lita, i arrestuar gjatë operacionit të SPAK “Metamorfoza”.
“Sot më datë 31.07.2023 Këshilli i Lartë i Prokurorisë, u thirr në mbledhje urgjente nga Kryetari i Këshillit, zoti Balla.
Dy vendimet që u morën sot janë:
- Pezullimi nga detyra e prokurorit Xhevahir Lita, drejtues në Prokurorinë e Shkallës së Parë të Juridiksionit të Përgjithshëm Kukës.
- Hapja e garës për drejtues në Prokurorinë e Shkallës së Parë të Juridiksionit të Përgjithshëm Kukës.
Deri në zgjedhjen e një drejtuesi të ri, kjo zyrë Prokurorie do të drejtohet nga Zv/ Drejtuesja, Enkeleda Hoxha”, thuhet në vendim.
Operacioni “Metamorfoza” u zhvillua nën drejtimin e SPAK-ut dhe vuri në pranga 6 persona, ndërsa u shpallën në kërkim 9 të tjerë.
Në operacion u përfshinë Forcat Speciale RENEA, FNSH, Forca e Posaçme Operacionale, Sektori për Hetimin e Grupeve Kriminale në Drejtorinë për Hetimin e Krimit të Organizuar në Departamentin e Policisë Kriminale, drejtoritë vendore të Policisë Shkodër, Lezhë, Vlorë dhe Tiranë, në drejtimin e SPAK-ut.
6 të arrestuarit u lanë në burg nga Gjykata e Posaçme, përkatësisht për biznesmenin Pëllumb Gjoka, shoqëruesin e tij, Edmond Preka, ish-shefi i krimeve Ardrit Hasanbegaj, ish-shefi i Operacionales, Oltian Bistri dhe kreu i Prokurorisë së Kukësit, Xhevahir Lita dhe Astmer Bilal.
Ata janë të akuzuar për 12 vepra penale të ngritura nga Prokuroria e Posaçme, duke nisur që nga grupi i strukturuar kriminal, korrupsioni, shpërdorimi i detyrës e deri te pastrimi i parave.
Gjatë këtij operacioni policia sekuestroi një arsenal armësh, 8 automjete (4 prej tyre të blinduara), maska, paruke dhe sende të tjera të paligjshme që përdoreshin nga pjesëtarët e grupit kriminal./Opinion.al
