Ambasadori gjerman në Shqipëri, Karl Bergner ka reaguar një ditë pasi opozita përfshiu nga tymi dhe zjarri Parlamentin gjatë seancës për miratimin e buxhetit 2024.
Në faqen zyrtare të ambasadës gjermane, Bergner u kërkon forcave politike që të bashkëpunojnë, në mënyrë që parlamenti të funksionojë për kontrollin e ekzekutivit dhe ligjvënien në interes të qytetarëve të përfaqësuar përmes deputetëve.
Ai thekson se propozimet që bëhen nga palët politike duhet të trajtohen sipas rregullave.
“Po ndjek me shqetësim zhvillimet e fundit në Kuvendin e Shqipërisë. Qytetarët/et e Shqipërisë presin me të drejtë nga parlamenti i tyre që të jetë një forum, ku anëtarët e të cilit të mund të prezantojnë dhe diskutojnë hapur propozime të ndryshme politike. Ky shkëmbim duhet të zhvillohet në paqe dhe të drejtohet nga rregullat, që i ka përcaktuar vetë parlamenti. Ndaj u bëj thirrje anëtarëve të shumicës dhe opozitës në Kuvend që të bashkëpunojnë, me qëllim që të garantojnë, që parlamenti të plotësojë rolin e tij thelbësor kushtetues: kontrollin e ekzekutivit dhe ligjvënien në interes të qytetarëve/eve të përfaqësuar përmes deputetëve”,- deklaron Bergner.
Opozita ka deklaruar se nuk do të heq dorë nga aksioni i saj për të ndaluar funksionimin e parlamentit, deri në ngritjen e komisioneve hetimore. Nga ana tjetër, mazhoranca thotë se aksioni i opozitës organizohet nga Berisha për shkak të problemeve që ka me drejtësinë.
