Ministria e Financave tentoi sot të qetësojë opinionin publik në lidhje me shqetësimin që ka krijuar vendimi për dhënien e administrimit të TVSH me koncesion.
Zv/ministria e Financave Irena Beqiraj tha se projekti i Ministrisë së Financave synon të modernizojë sistemin dixhital që monitoron transaksionet e shitjes në shtetin shqiptar.
Partneriteti me privatët nuk është një praktikë ekstra shqiptare ka pohuar Beqiraj por përdoret edhe nga vendet e zhvilluara për të si një mënyrë për të siguruar investime të rëndësishme.
Ministria e Financave që nga propozimi i projektit ka punuar me muaj të tërë dhe termat e referencës kanë ndryshuar nga propozimi fillestar. Ajo ka pohuar se nuk bëhet fjalë për lëshimin e të drejtave ekskluzive tek privati siç është mbledhja e TVSH-së. Ajo tha se nuk është koncesion por një partneritet publik privat, në interes të publikut dhe jo të shtetit.
Ajo deklaroi se kjo platformë do t’i rrisë të ardhurat e shtetit në 10 vitet e ardhshme me 180 mln dollarë.
Në total të ardhurat nga TVSH -ja ne dekaden ne vijim pritet të rriten me 440 milionë dollarë, nga të cilat 180 milionë dollarë do të jetë rritja nga administrimi i skemës se TVSH-se nga Partneriteti, Publik-Privat.
Në këtë shume 180 mln USD, nese rritja vjetore do të jete 11 për qind, e ardhura e arkëtuar do të ndahet 90 % për koncesionarin dhe 10 % për buxhetin. Nëse e ardhura rritet nga 11-15% atëherë, ndarja bëhet 65 % për koncesionarin dhe 35% për qeverinë.
Por Shqipëria nuk ka përvojë në monitorimin e partneriteteve publike dhe private. Fondi Monetar Ndërkombëtar, në një raport të fundit për transparencën fiskale ka pohuar se, vala e koncesioneve ka përfshirë të gjithë sektorët, duke u shtrirë edhe ne menaxhimin e infrastrukturës edhe shërbimeve në shëndetësi, qeveria ende nuk i ka të qarta detyrimet që do të paguajë ndaj tyre.
