Qeveria do të japë me koncension një kompanie ndërtimin e një server të ri për Tatimet që do mundësojë faturat elektronike. Por specialistët thonë se serveri ekzstues është funksional dhe me një investim të vogël mund të lëshohen edhe faturat elektronike.
Serveri ekzistues, që është një server i ri, është ngritur me ndihmën e qeverisë austriake dhe ka kushtuar rreth 9.2 milionë euro.
Ky server kryen të gjitha funksionet dhe koordinimin e Tatimeve me kasat fiskale, nuk e mundëson një faturë elektronike, të cilën Ministria e Financave e dëshiron aq shumë, por ama….ka një problem.
Në studimin e fizibilitetit që ka bërë Ministria e Financave, thuhet vetëm që ky server nuk e mundëson faturën elektronike, por ministria nuk ka kryer asnjë ekspertizë nëse këtij server të ri ekzistues, mund t’i shtohet ky opsion me një investim minimal.
Renald Rista, ish Shef i IT në Drejtorinë e tatimeve ka deklaruar pak ditë më parë se plotësimi i serverit ekzistues me kontrollin mbi faturën elektronike është plotësisht i mundshëm.
Çështja bëhet dhe më interesante kur në raportin e ekspertëve, renditen disa defekte të serverit ekzistues. Ekspertët e konsultuar nga HashtagAL, kanë deklaruar se problemet e shfaqura në raport janë të gjitha probleme që zgjidhen me shpenzime minimale, pasi janë lapsuse të sistemit dhe nuk përfaqësojnë limite të parametrave të tij.
Një “Upgrade” që kushton diku tek 10 mijë euro, do ishte i mjaftueshëm që defektet e renditura nga ekspertët e ministisë, të ishin zgjidhur brenda një jave.
Fakti që ekspertët e Ministrisë së Financave dhe studimi i fizibilitetit i hartuar prej tyre, nuk ka bërë asnjë llogari mbi mundësinë teknike për aplikimin e funksioneve të reja me serverin ekzistues, zgjon dyshimet se kompania ofertuese “M.POS”, me shpenzime minimale shtesë do ta ofrojë shërbimin e ri duke shfrytëzuar serverin ekzistues, të instaluar që në janar 2015 me shpenzimet e qeverisë. /HashtagAL/
