Provat e mbledhura deri tani na kanë dhënë dyshime të arsyeshme se pas sulmit mbi aeroportin Ataturk të Stambollit qëndron Shteti Islamik. Ka qenë kjo deklarata e ministrit të Brendshëm të Turqisë Efkan Ala, i cili ka përforcuar në këtë mënyrë pistën ISIS.
Ai tha gjithashtu se bilanci i viktimave është rritur nga 41 në 43 pasi dy të plagosur kanë ndërruar jetë në ambientet spitalore, raporton express.
“Provat tregojnë se sulmi është ndërmarrë nga shteti islamik, megjithatë hetimet ende nuk kanë përfunduar. Një qëndrim zyrtar do të vijë në ditët e ardhshme. Mund tu them se numri i viktimave ka arritur në 43”, tha ministri turk.
Më herët mediat turke duke cituar burime konfidenciale komunikuan se terroristët që sulmuan aeroportin vinin nga Rusia, Uzbekistani dhe Kirgistani, shtete këto që kanë qenë pjesë e ish-Bashkimit Sovjetik në të shkuarën.
