Një anëtare e grupit të turistëve kroatë që ka qenë duke eksploruar Majën e Jezercës, për shkak të terrenit të thepisur, ka rrëshqitur dhe ka humbur jetën.
Bëhet me dije se turistja 43-vjeçare, ishte pjesë e një ekipi kroat alpinistësh të cilët po zhvillonin një ekspeditë në lartësinë e malit të Jezercëz.
Në një moment turistja është rrëzuar në një terren të thepisur malor dhe është gjetur më pas e vdekur nga efektivët e policisë.
Nga ekipi i kërkim-shpëtimit është bërë e mundur nxjerrja e trupit të pajetë dhe do transportohet me helikopter, drejt morgut.
Ndërkohë vijon operacioni i shpëtimit, mbështetur nga Ministria e Shëndetësisë dhe Mbrojtjes, për të bërë të mundur nxjerrjen e turistëve të tjerë, nga vendi ku janë bllokuar.
“Salla Operative e Komisariatit të Policisë Tropojë ka marrë njoftim nga një grup aplinistësh, që mendohet të jenë shtetas kroatë, të cilët janë ngjitur nga territori i Malit të Zi, për të mbërritur në vendin e quajtur “Maja e Jezerces”, se njëra nga anëtaret e grupit kishte rënë nga një terren i thepisur malor dhe me borë.
Menjëherë pas marrjes së njoftimit, shërbimet e Komisariatit të Policisë Tropojë, së bashku me ekipin mjekësor të spitalit të Tropojës dhe ekipin e kërkim-shpëtimit, janë nisur bashkë me helikopterin e Emergjencave Civile, drejt adresës së dhënë.
Pas disa orësh kërkime nga shërbimet e Policisë, turistët u lokalizuan në vendin e quajtur “Maja e Jezercës”.
Turistja kroate, shtetasja Z. L., 43 vjeçe, për shkak të terrenit të thepisur malor, ka rrëshkitur nga një lartësi dhe për pasojë kishte humbur jetën”, thuhet në njoftimin e policisë./Opinion.al
