Shqipëria është një destinacion i rëndësishëm për turistët e huaj.
Sipas tur operatorëve, viti 2025 rezervimet i ka në në rritje në krahasim me vitin 2024.
“Pritja është që të vazhdojë rritja, por përqindja e rritjes në raport me një vit më parë duhet të jetë më e ulët dhe nëse shikojmë se si është spostuar përqindja në progres besoj në këtë vit do të jemi me fat, pra do të kemi një rritje 25%”, tha eksperti Aneo Hila.
Netët e qëndrimit gjatë vitit 2024 janë rritur me 24% duke e renditur Shqipërinë në krye të listës së vendeve europiane për zgjerimin e netëve të qëndrimit. Por kjo rritje sipas ekspertit Aneo Hila do jetë më e madhe nëse do ketë shtim të kapaciteteve akomoduese.
“Në vartësi të sezonit ndryshon dhe mesatarja e ditëve që turistët e huaj vijnë në Shqipëri. Tipikisht gjuhen fundjavat, pra është tre-katër ditëshi i fundjavës. Që të rritet mesatarja duhet të rriten strukturat që japin ofertën e “All Inclusive”, sepse këto janë pushimet që janë po 10 ditore dhe këto rrisin mesataren e përgjithshme“, tha Hila.
Vlerësimi kryesor për Shqipërinë mbetet mikëpritja dhe ushqimi.
“Mezi presin të kthehen përsëri, marrin dhe atë efektin uau, kur vijnë dhe dua ta theksoj këtu se Shqipërinë nuk e kemi akoma në atë nivelin infrastrukture që të japi këtë lloj efekti uau dhe ky efekt vjen nga njerëzit. Gjithmonë spikaten njerëzit, çiltërsia, dashamirësia, qasja që kanë shqiptarët në tërësi me turistët e huaj i impresionon jashtë mase”, tha Hila.
Tirana është qyteti më i vizituar, ndjekur nga Berati, Kruja, Durrësi dhe Gjirokastra.
Klan News
