Kanë ardhur nga Amerika dhe po përjetojnë një eksperiencë të veçantë në vendin tonë. Për disa prej tyre është ajo që kanë ëndërruar, të udhëtojnë në vende të panjohura dhe të takojnë njerëz të rinj.
Ky grup turistësh amerikanë po pushojnë në Parkun Kombëtar të Shebenik Jabllanicës. Përveçse shijojnë natyrën ata janë bashkuar me fermerët dhe po mbjellin patate.
Kjo kulturë në këtë zonë mbillet ende si dikur, jo me makineri por me parmendë. Për këtë fakt turistët shprehen të mrekulluar.
“Jemi të lumtur që po mbjelli patate këtu në Parkun Kombëtar të Shebenikut. Është një mrekulli këtu, njerëz të mrekullueshëm, ushqim fantastik, ajër të freskët. Gjithçka e freskët, njerëz që të hyjnë në zemër. Ejani këtu, qëndroni disa ditë, merrni njerëz të tjerë, mbillni tokën dhe shijojeni”, shprehet turisti amerikan. Parku i Shebenik Jabllanicës është ndër më të vizituarit në vendin tonë. Ai zgjidhet çdo vit nga mijëra turistë.
“Është një turizm i ri që po implentohet akoma në Parkun Kombëtar të Shebenikut. Grupe të ndryshme turistësh, përveçse shijojnë natyrën duan të kontribuojnë në mbjelljen e kulturave bujqësore, sidomos në mbjelljen e patateve, e cila është një nga variatet më të mira bujqësore të Shqipërisë”, tha Fatmir Brazhda, drejtor i Zonave të Mbrojtura në Elbasan.
Qarku i Elbasanit zgjidhet veçanërisht për destinacionet natyrore ndërsa turizmi malor po njeh rritje çdo vit e më shumë.
Klan News
