2025 pritet të jetë një vit pozitiv turistik.
Për tur-opratorët kontratat tashmë janë lidhur dhe shifrat tregojnë se 2025 do të ketë një rritje prej 15% – 20% më shumë se viti 2024, ndërsa pritshmëritë janë që nga kjo industri të gjenerohen 5 miliardë Euro.
“Tur-operatorët pothuajse i kanë të ezauruara kapacitetet. Këtë vit, duke ju referuar këtyre kontratave, ne jemi gati për 15%-20%. Ne mendojmë që këtë mund të shkojmë 5 miliardë Euro të gjenerohen në ekonominë shqiptare nga turizmi”, thotë Rrahman Kasa, kreu i Unionit Turistik.
Një treg i ri që po zgjedh Shqipërinë janë turistët izraelitë, ndërsa ekzistueset, si Italia, Polonia dhe vende të Lindjes së Mesme po shtohen në numër.
“Kryesisht janë tregu i Izraelit. Kemi pastaj edhe shtim të numrit nga vendet e Lindjes së Mesme, nga Gjermania”.
Zonat që janë më të kërkuara nga të huajt mbetet bregdeti i Durrësit, ajo e Jonit, dhe më pak vija bregdetare në veri të vendit.
“Kryesisht më mirë është pjesa e bregdetit të Durrësit. Një volum të madh të këtyre hoteleve e kanë kontrata me garanci, por edhe hotelet e jugut janë pothuajse me të njëjtin trend”.
Kryetari i Unionit Turistik, Rrahman Kasa, thotë se tashmë në vendin tonë mund të flasim për turizëm cilësor, pasi edhe mesatarja e shpenzimeve të turistëve të huaj në vend shkon mbi 100 Euro dita.
“Gjë që tregon se po i përafrohemi rajonit me koston ditore që po shpenzon një turist në Shqipëri, flas gjithmonë për turizmin deri te turizmi i mesëm, cilësor”.
Gjatë vitit që lamë pas, Shqipëria mikpriti rreth 12 milionë turistë, duke shënuar një rritje me 15.2% të vizitorëve të huaj në vend, ndërsa bëhet gati që të kapërcejë jo vetëm shifrat e 2024 por edhe me synimin që të ofrojë edhe një performcaë edhe më të mirë të shërbimeve në këtë sektor.
Tv Klan
