Dhjetëra qytetarë së bashku me drejtuesit e partive të reja opozitare, “Shqipëria Bëhet” dhe “Nisma Thurje” po zhvillojnë para dyerve të SPAK një tubim në shenjë mbështetjeje ndaj Prokurorisë së Posaçme.
Në një dalje për mediat, kreu i “Nisma Thurje”, Endri Shabani tha se aleanca e qelbësirave, ku sipas tij bëjnë pjesë Sali Berisha, Ilir Meta dhe Edi Rama, u plotësua me arrestimin e Veliajt dhe së bashku kërkojnë të godasin SPAK-un.
“Duan ta mbajnë këtë vend në tranzicion, që ka 34 vite që ky popull vidhet, përqeshet dhe merret zvarrë dhe këtyre nuk u hyn asnjë gjemb në këmbë. Ne duam që kjo të marrë fund dhe aleanca e qelbësirave do që kjo gjë të vazhdojë. Ne jemi padyshim bashkë kundër tyre dhe padyshim jemi bashkë me Shqipëria Bëhet, me çdo të ri, me çdo qytetar të ndershëm që do që pandëshkueshmëria në këtë vend të marrë fund”, u shpreh Shabani.
Shabani kërkoi arrestimin e kryeministrit Rama, pasi sipas tij ka uzurpzuar Bashkinë e Tiranës dhe në 48 orët e fundit i ka bërë presion institucioneve të drejtësisë.
“Ka dy zgjedhje. Ata që duan që ky vend mos të ketë drejtësi. Që këtu të shkojnë në burg vetëm nënat që lidhin energjinë elektrike në mënyrë të parregullt, baballarët që riparojnë çatinë, por këta që na kanë vjedhur mos të shkojnë kurrë në burg. Edi Rama doli hapur duke sulmuar SPAK-un. Rama është një kryeministër në detyrë që duhet arrestuar pasi në këto 48 orë po prish provat, po intimidon dëshmitarët, ka shkuar nga kryeministër që është pushtet qendror, ka shkuar në zyrën e Bashkisë duke uzurpuar një pushtet vendor. Pra ka dalë nga shinat. Prandaj ky është komenti për të mbështetur SPAK-un dhe unë dua ti them: ‘Nuk jeni kurrë vetëm’. Padyshim që keni përballë kriminelët dhe hajdutët, por ju keni në krah popullin shqiptar”, tha Shabani.
