Lulzim Basha ka thënë sot se kërkesat e parashtruara nga partitë e vogla aleate janë në të njëjtën linjë me Partinë Demokratike. Nga selia blu, Basha tha se kushti i panegociueshëm është largimi i Edi Ramës.
“Nuk ka asnjë mospërputhje mes qëndrimeve të PD-së dhe koalicionit. PD përfundoi një dokument të detajuar për detyrat e qeverisë tranzitore për zgjedhjet, e kemi diskutuar me aleatët dhe një pjesë e mirë e pikave janë të njëjtat me programin tonë. Koalicioni po vepron në sinergji, të tjerat janë detaje të parëndësishme. Kusht i padiskutueshëm është largimi i Edi Ramës dhe do të ketë zgjedhje vetëm kur të ikë ai”, tha Basha.
Ai nuk iu përgjigj pyetjes së gazetarëve në lidhje me kërkesën që partitë e vogla kanë bërë për Presidentin e Republikës, për të thirrur një tryezë të përbashkët mes mazhorancës dhe opozitës për zgjidhjen e krizës politike.
Mëngjesin e sotëm, partitë e vogla aleatë të Partisë Demokratike propozuan ndryshime kushtetuese, si edhe folën për domosdoshmërinë e një takimi Rama-Basha së bashku me kryetarët e partive të tjera, për zgjidhjen e krizës politike.
Edhe në vitin 2017 ishte një iniciativë e kryetarëve të partive të vogla, fillimisht e Fatmir Mediut të Partisë Republikane dhe Agron Dukës të Partisë Agrare Ambientaliste, për të thirrur një tryezë të përbashkët.
Në të njëjtën ditë, në kryesinë e Kuvendit u takuan më pas në një takim kokë më kokë Edi Rama me Lulzim Bashën, të cilët arritën marrëveshjen e famshme të 17 majit dhe pjesëmarrjen e opozitës në zgjedhje./Opinion.al
