Psikoseksologia Besarta Taçi ka folur për një çështje tepër shqetësuese në ditët e sotme, ajo e shikimit të pornografive nga fëmijët dhe adoleshentët. Në emisionin “Shije Shtëpie”,ajo ka thënë se ka një ndikim mjaft të keq tek të rinjtë, ku sipas saj truri i tyre nuk është i përgatitur për imazhet e forta të pornografisë.
Besarta Taçi: Për ndikimin në tru, sigurisht që është një ndikim i drejtpërdrejtë, qoftë në lobin ballor përsa i përket përqendrimit, por dhe për faktin se mos harrojmë, truri i një adoleshenti nuk është i parapërgatitur për të pasur imazhet aq të forta të pornografisë edhe pse pornografia është e strukturuar me kategori të ndryshme. Eksplorimi i një adoleshenti shkon në kategori të cilat, në impakt të parë, normalisht rezultojnë shumë të forta, por në të njëjtën stimuli viziv dhe eksitimi tek një fëmijë 11, 12, 13-vjeçar është kaq shumë gjithëpërfshirës në sistemin e tij mendor qendror, që automatikisht e humb kontrollin e dëshirës së eksitimit dhe sjelljes dhe në këtë aspekt krijohet varësia e mirëfilltë.
Çështja është se sa më shumë unë të shikoj video porno, aq më shumë do të kem nevojë që të shikoj video më të gjata, e kështu që edhe koha humbet pikërisht në këtë mekanizëm, por edhe eksitimi do jetë gjithmonë në doza më të larta, gjë që një adult ka kontrollin e mirë të impulseve dhe le të themi që di të japë dhe STOP-in, kurse një fëmijë jo.
Katerina Trungu: Dhe kjo gjë mund të reflektohet në sjelljen e tij të përditshme? E kthen në një fëmijë, përveçse të varur, ndoshta dhe më agresiv?
Besarta Taçi: E imagjinojmë të gjithë ndjesinë e fajit, imagjinojmë vështirësinë në përqendrim, problematikat në shkollë, nevojat për të shkuar në banjot e shkollës për të parë këto video, pra destrukturohet e gjithë jeta e mëparshme e këtij fëmije./Opinion.al
