Autoritetet italiane janë përqendruar tek pista e vrasjes, sa i përket rastit të Ledina Krujës, 40-vjeçares shqiptare, e gjetur e pajetë më 7 Qershor në ujërat e lumit “Po”, pranë qytetit të Piacenzas.
Janë disa të dhëna që kanë bërë që prokurorët italianë ta hetojnë si vrasje këtë çështje, e cila pak ditë më parë, fill pas gjetjes së trupit, mendohej se ishte një vetëvrasje. Dy të dhënat kryesore janë disa shenja dhune në qafën e gruas, të ngjashme me shenjat e mbytjes. Ndërsa detaji tjetër, që përforcon pistën e vrasjes, janë disa shenja në tokë, shumë pranë makinës së viktimës, që kanë ngjallur dyshimet se shqiptaren mund ta kenë tërhequr zvarrë dhe më pas mund ta kenë hedhur në lumë.
Ledina Kruja jetonte prej 5 vitesh në Miradolo Terme, pranë zonës ku u gjet automjeti i saj dhe punonte si shërbyese në një shtëpi. Ajo ishte e martuar, me dy fëmijë 18 e 12 vjeç dhe sapo kishte blerë një banesë.
Personat që e njohin nga afër 40-vjeçaren, e përshkruajnë si një njeri të qetë e pa probleme, një njeri që kurrësesi nuk mund të mendosh se do të kryejë vetëvrasje.
Tv Klan
