Imazhet e reja satelitore nga Maxar Technologies tregojnë se trupat e civilëve të vdekur në Bucha ishin të shtrirë në rrugë për javë të tëra, duke përfshirë edhe kohën kur qyteti ishte nën kontrollin rus.
New York Times publikoi për herë të parë imazhet të hënën. Ato tregojnë shumë civilë me duar të lidhura, plagë të shkaktuara me armë zjarri nga afër dhe shenja torture, pamje që dolën në dritë në të njëjtën ditë kur Ukraina e shpalli qytetin të çliruar nga trupat ruse.
Në përgjigje të pamjeve në Bucha të shtunën, Ministria Ruse e Mbrojtjes pretendoi se videoja ishte “e rreme” dhe “e inskenuar”. Ajo tha se video, fotot dhe pretendimet për krime lufte ishin “një provokim tjetër”.
“Gjatë kohës që vendbanimi ishte nën kontrollin e forcave të armatosura ruse, asnjë banor i vetëm vendas nuk pësoi ndonjë veprim të dhunshëm”, tha ministria.
Por imazhet satelitore hedhin poshtë këtë pretendim nga rusët: Objektet që shihen në rrugën Yablunska në imazhet satelitore përputhen me vendndodhjet e sakta ku trupat shihen në rrugë.
Imazhet satelitore tregojnë se trupat e pajetë ishin në rrugë në Buchan jugore që nga të paktën 18 marsi, kur Rusia kishte nën kontrollin e qytetit.
Forcat ruse mbajtën nën kontroll Buchan deri më 31 mars./Opinion.al
