Administrata e presidentit amerikan Donald Trump do të tërheqë statusin e përkohshëm ligjor për 530 mijë kubanezë, haitianë, veneziuelianë dhe nikaraguanë në Shtetet Bashkuara, në lëvizjen e radhës kundër emigracionit.
Siç bëri të ditur Regjistri federal, këta emigrantë janë paralajmëruar të largohen nga vendi para se lejet e qëndrimit apo mburoja kundër deportimit të shfuqizohet më 24 prill.
530 mijë emigrantët kanë ardhur në SHBA mbi bazë të një programi nën udhëheqjen e Biden, i njohur si CHNV dhe që synonte krijimin e mundësive drejt migracionit të ligjshëm. Trump e pezulloi programin menjëherë pasi erdhi në detyrë. Është e paqartë se sa prej këtyre emigrantëve kanë qenë në gjendje të sigurojnë një status tjetër që mund ti lejonte të qëndronin në SHBA.
I prezantuar në 2022, programi mbulonte fillimisht venezuelianët para se të zgjerohej edhe tek vendet e tjera. Ai lejonte emigrantët dhe familjarë të afërm të fluturonin drejt SHBA, nëse kishin sponsor amerikanë dhe të qëndronin për 2 vjet si pjesë e një statusi të përkohshëm.
Administrata Biden pretendonte se një skemë e tillë do të kufizonte kalimet e paligjshme në kufijtë jugor të SHBA dhe do të lejonte një proces më të mirë kontrolli ndaj atyre që hyjnë në vend. Por sipas Trump, programi i kalonte kufijtë e ligjit federal, dhe kërkoi mbylljen e tij përmes një urdhri të firmosur me 20 janar. Trump po konsideron gjithashtu të anulojë statusin ligjor të rreth 240 mijë ukrainasve që kanë mbërritur në SHBA gjatë konfliktit me Rusinë.
