I paprecedentë konsiderohet nga analistët ndërkombëtarë debati që ndodhi në Zyrën Ovale të Shtëpisë së Bardhë mes Presidentit amerikan Donald Trump, zëvendësit të tij JD Vance dhe Presidentit ukrainas Volodimir Zelenski.
Pamjet e këtij debati që u transmetuan në të gjithë botën janë kryefjala e mediave ndërkombëtare.
Por çfarë ndodhi pas situatës së tensionuar?
Trump dhe Zelenski do të duhej të bisedonin privatisht së bashku me stafet respektive për marrëveshjen që do të çonte në përfundimin e luftës Rusi-Ukrainë.
SHBA kërkon mineralet e rralla të Ukrainës, ndërsa kjo e fundit kërkon garanci për paqen.
Por nuk ndodhi kështu. Menjëherë pas debateve live, sipas shtypit botëror, Trump dhe Zelenski shkuan në dhoma të ndara. Presidenti amerikan njoftoi Sekretarin e Shtetit Marco Rubio se Zelenski dhe delegacioni ukrainas që e shoqëronte duhet të largoheshin nga Shtëpia e Bardhë.
Ukrainasit kundërshtuan dhe insistuan që të zhvilloheshin bisedimet për të cilat ishin kishin shkuar në takim. Mirëpo Trump urdhëroi largimin e tyre.
Presidenti Zelenski doli nga Shtëpia e Bardhë. Asnjë marrëveshje nuk u nënshkrua.
Pas këtij momenti, reagoi Zelenski në rrjetet sociale që falenderoi SHBA-në për mbështetjen dhe tha se po punojnë për paqen e Ukrainës.
Më pas reagoi edhe Presidenti Donald Trump, i cili theksoi se Zelenski mund të kthehet në Shtëpinë e Bardhë kur të jetë gati për të firmosur.
Reaguan edhe liderët europianë, të cilët shprehën mbështetjen për Zelenskin duke i thënë se “nuk është vetëm”.
Demokratët amerikanë dënuan sjelljen e Presidentit Trump dhe zv/Presidentit Vance, duke thënë se Presidenti ukrainas ishte thirrur në një pritë.
Nga ana tjetër, Rusia duartrokiti qëndrimin e SHBA dhe dënoi sjelljen e Zelenskit brenda Shtëpisë së Bardhë.
Konferenca për shtyp që ishte planifikuar mes Presidentëve Trump-Zelenski u anulua. Asnjë marrëveshje nuk u firmos.
Mediat ndërkombëtare e konsiderojnë takimin një “përplasje të zjarrtë”./tvklan.al
