Presidenti i sapo zgjedhur amerikan, Donald Trump ka biseduar drejtpërdrejt me Presidenten e Taivanit, duke thyer kështu politikën e Shteteve të Bashkuara të Amerikës të vendosur në 1979 –ën, kur marrëdhëniet formale mes palëve u ndërprenë.
Sipas BBC, Trump dhe Presidentja Tsai Ing – wen theksuan nevojën për një “përforcim të marrëdhënieve ekonomike, politike dhe të sigurisë” mes SHBA dhe Taivanit.
Kjo lëvizje rrezikon që të tensionojë marrëdhëniet me Kinën, e cila e konsideron Taivanin si provincë të shkëputur prej saj.
Ministri i Jashtëm kinez Wang Yi mësohet se e ka konsideruar këtë bisedë telefonike mes palëve si një “përpjekje të dëshpëruar” nga Taivani.
Por çfarë ndodhi?
Të premten Trump shkruajti në Twitter se Tsai e kishte telefonuar për ta uruar për fitoren në zgjedhjet presidenciale. Edhe Trump nga ana e tij mësohet se e uroi Presidenten për zgjedhjen e saj në krye të vendit Janarin e shkuar.
Sipas BBC është diçka tepër e pazakontë që një president i zgjedhur amerikan të flasë drejtpërdrejt me një lider taivanez.
Nga ana e saj Shtëpia e Bardhë deklaroi se biseda e Trump nuk do të sjellë asnjë ndryshim në politikat e SHBA./tvklan.al
