Presidenti i Shteteve të Bashkuara, Donald Trump paralajmëroi bisedime me homologun e tij rus Vladimir Putin dhe atë kinez Xi Jinping, lidhur me situatën në Venezuelë.
“Ne do të bisedojmë (për situatën në Venezuelë) në një pikë. Unë do të flas me shumë njerëz, ndoshta me presidentin Putin, ndoshta me presidentin Xi të Kinës”, u tha gazetarëve presidenti Trump.
Komentet e Trumpit vijnë pasi Uashingtoni dënoi dërgimin e forcave ushtarake të Rusisë në Venezuelë, teksa pretendojnë se se prania e trupave ruse do të destabilizojë këtë shtet.
I dërguari i posaçëm i SHBA-së për Venezuelë, Elliott Abrams tha se Uashingtoni vlerëson se janë rreth 100 pjesëtarë të personelit ushtarak të Rusisë në Venezuelë dhe se prania e tyre është “jashtëzakonisht e dëmshme” për vendin.
Nga ana tjetër Rusia pranoi se kishte dërguar “specialistë” në Venezuelë por tha se ata nuk përbënin kërcënim për stabilitetin e vendit, pasi ishin dërguar nën një marrëveshje bashkëpunimi ushtarak, mes dy palëve.
“Rusia nuk po ndryshon balancën e pushtetit në rajon, Rusia nuk po kërcënon askënd, ndryshe nga zyrtarët në Uashington”, thanë zyrtarët rusë.
Kremlini nuk iu përgjigj thirrjes së ardhur nga SHBA-ja për të hequr të gjithë personelin ushtarak nga vendi, teksa shtoi se Rusia nuk po ndërhynte në punët e brendshme të Venezuelës dhe se shpresonte se edhe vendet e tjera do të lejonin venezuelasit të vendosnin vetë fatin e tyre.
Kujtojmë se Amerika dhe Rusia ndajnë pikëpamje krejtësisht të ndryshme lidhur me konfliktin politik në Venezuelë, vend ky që po përballet me kolapsin ekonomik dhe një krizë humanitare të thellë.
Shtetet e Bashkuara dhe shumica e vendeve perëndimore përkrahin liderin opozitar, Juan Guaido, i cili ka shpallur veten president të përkohshëm më 23 janar ndërsa Rusia, Kina, Irani, Kuba, Turqia, Bolivia mbështesin Maduron./Opinion.al
