Presidenti i Shteteve të Bashkuara, Donald Trump, i cili ndodhet për vizitë në Japoni, tha se Uashingtoni nuk dëshiron ndryshimin e regjimit në Iran, por një “Iran pa armë bërthamore”. Trump shtoi se nuk do ta lëndojë Iranin por nuk do më armë bërthamore.
“Mendoj se do të bëjmë marrëveshje me Teheranin. Unë besoj se Irani do të dëshirojë të flasë dhe nëse dëshiron, ne do të dëshirojmë po ashtu. Unë nuk dua ta lëndoj Iranin. Dua t’i them: Jo armë bërthamore. Kemi mjaft probleme në këtë botë me armët bërthamore. Jo armëve bërthamore për Iranin”, tha Trump, pas bisedimeve me kryeministrin e Japonisë, Shinzo Abe, në Tokio.
Shtetet e Bashkuara dyshojnë se Irani po punon fshehurazi në krijimin e armës atomike dhe kërkojnë negocimin e një marrëveshjeje më të gjerë për kontrollin e armëve. Nga ana tjetër Irani i hedh poshtë këto akuza dhe deri më tani nuk është shprehur i gatshëm për bisedime.
Marrëdhëniet midis Teheranit dhe Uashingtonit janë tensionuar ndjeshëm një vit më parë kur SHBA është tërhequr nga një marrëveshje bërthamore midis Iranit dhe gjashtë fuqive botërore.
Me këtë marrëveshje, që është arritur në vitin 2015, Irani ka kufizuar programin e tij bërthamor, në këmbim të lehtësimit të sanksioneve ekonomike ndërkombëtare.
Pas tërheqjes nga marrëveshja, Uashingtoni ka rivendosur sanksione kundër Iranit, ka përshkallëzuar retorikën ndaj tij dhe ka rritur praninë ushtarake në Lindjen e Mesme, duke shkaktuar shqetësime për një konflikt të mundshëm ushtarak me Republikën Islamike./Opinion.al
