Presidenti Donald Trump ka thënë se do të konsiderojë mundësinë për të dëshmuar para Kongresit për akuzat që janë ngritur ndaj tij.
Në një postim në Twitter të hënën Trump shkruajti se do ta “konsideronte seriozisht” mundësinë pasi kryetarja i Dhomës së Ulët të Kongresit Nancy Pelosi ia sugjeroi atë gjatë fundjavës.
Hetimi i udhëhequr nga demokratët po përcakton nëse Trump i premtoi ndihmë Ukrainës në këmbim të një hetimi ndaj ish-Zëvendës Presidentit Joe Biden.
Presidenti republikan e ka hedhur poshtë akuzën si një “gjueti shtrigash”.
Të Dielën, zonja Pelosi tha se presidenti ishte i mirëpritur të “flasë të gjithë të vërtetën që ai dëshiron nëse dëshiron” para hetuesve.
Në postimin e tij, Trump sulmoi zonjën Pelosi duke e quajtur fjalimin e saj “të çmendur”, por tha që ai do të konsiderojë të dëshmojë “në mënyrë që Kongresi të përqendrohet përsëri”.
Presidenti kohët e fundit është përballur me kritika të reja për përdorimin e tij të Twitter. Chuck Schumer, udhëheqësi demokrat në Senat, u tha gazetarëve se nëse zoti Trump “nuk i pëlqen ato që ai po dëgjon, ai nuk duhet të shprehet në Twitter”, por përkundrazi “të dëshmojë nën betim”.
Komentet e tij erdhën pasi Trump sulmoi në Twitter një dëshmitare, Marie Yovanovitch, ish ambasadorja amerikane në Ukrainë, ndërsa ajo po dëshmonte në Kongres të premten.
Zonja Yovanovitch tha që deklarata ishte “shumë frikësuese”, gjë të cilën zoti Trump e mohoi.
Zonja Yovanovitch u shkarkua si ambasadore në Kiev në maj, dy muaj para një telefonate të dyshimtë midis Trump dhe homologut të tij ukrainas, Volodymyr Zelensky, i cili tani është çelësi i hetimit.
Një transkriptim i telefonatës zbuloi se Trump i kishte kërkuar Presidentit Zelensky të hetojë pretendimet e pabazuara kundër Biden dhe djalit të tij Hunter, i cili ishte pjesë e bordit të një kompanie gazi në Ukrainë.
Së fundmi, zyrtari i departamentit të shtetit David Holmes u tha hetuesve në dëshminë me dyer të mbyllura të shtunën se ai kishte dëgjuar një diplomat amerikan duke i thënë Presidentit Trump se Ukraina do të kryente hetimet që presidenti kishte kërkuar. /Opinion.al
