Presidenti amerikan Donald Trump ka bërë të ditur përmes një postimi në Twitter se SHBA ka në shënjestër 52 vendqëndrime iraniane dhe do t’i sulmojë në rast se Irani sulmon amerikanët apo vendet e tyre.
Kjo deklaratë e Trump ka ardhur pas vrasjes së gjeneralit të lartë iranian, Qassem Soleimani, ndodhur në sajë të një sulmi me dron pranë aeroportit të Bagdadit.
Vrasja e tij ka sjellë tension shumë të madh të marrëdhënieve mes dy vendeve, ndërkohë që autoritetet në Iran janë zotuar për hakmarrje ndaj SHBA-së lidhur me këtë sulm.
Sipas Trump, zyrtarët në Iran po flasin me shumë guxim për shënjestrimin e aseteve të SHBA dhe ka theksuar se janë piketuar 52 vende iraniane, disa prej të cilave kanë rëndësi shumë të madhe për Iranin dhe kulturën e këtij vendi.
Ai ka paralajmëruar se nëse Irani sulmon ato do të goditen shumë shpejt dhe fuqishëm. Lidhur me këtë shifër Presidenti i SHBA tha se ajo paraqet numrin e pengjeve amerikane që u mbajtën të ngujuar për më shumë se një vit në Iran pasi ishin rrëmbyer nga ambasada amerikane në Tehran.
Sipas BBC, pas kësaj deklarate faqja online e një agjencie qeveritare amerikane u hakua nga një grup i quajtur “Grupi i Hakerëve Iranianë të Sigurisë Kibernetike”.
Trump ka vijuar me paralajmërimet përmes një tjetër postimi në profiling e tij në Twitter:
“SHBA shpenzoi dy trilion dollarë për pajisjet ushtarake. Ne jemi më të mëdhenjtë dhe deri tani më të MIRËT në botë! Nëse Irani sulmon një bazë Amerikane, apo ndonjë Amerikan, ne do dërgojmë disa nga këto pajisjet e bukura të reja… pa hezitim!”,-ka theksuar ai./Opinion.al/
