Ukraina iu kundërpërgjigj sulmeve ruse dhe goditi një bazë ajrore të shtunën, ndërsa Rusia vazhdoi të bombardojë me qindra dronë gjatë natës. Sulmet e të dy palëve janë intensifikuar çka shuan shpresat për një armëpushim për t’i dhënë fund luftës më shumë se 3-vjeçare.
Shtabi i Përgjithshëm Ushtarak i Ukrainës njoftoi goditjen e bazës ajrore Borisoglebsk në rajonin Voronezh të Rusisë, ku vendosen avionë luftarakë Su-34, Su-35S dhe Su-30SM të Rusisë. Sulme të tilla ndaj bazave ajrore ruse synojnë të dëmtojnë aftësinë ushtarake të Rusisë dhe të demonstrojnë aftësinë e Ukrainës për të goditur objektiva me vlerë të lartë.
Rusia ndërkohë lëshoi 322 dronë gjatë natës të shtunën. Nga këto, 157 u rrëzuan dhe 135 u humbën.
Ndërsa lufta vazhdon, presidenti i SHBA-së, Donald Trump, komentoi telefonatën që pati me homologun rus, Vladimir Putin dhe u shpreh “i zhgënjyer”.
“Jam shumë i zhgënjyer me bisedën që pata me presidentin Putin, nuk ka prova se ai kërkon fundin e luftës”, u tha Trump gazetarëve. Presidenti shtoi se me Putinin diskutoi edhe sanksionet. “Ai e kupton se ato po afrohen dhe është i shqetësuar,” shtoi Trump.
Ai foli gjithashtu edhe me presidentin ukrainas Volodymyr Zelenskiy, me të cilin diskutoi mundësinë e dërgimit të raketave të mbrojtjes ajrore Patriot.
I pyetur nëse Shtetet e Bashkuara do të furnizojnë Ukrainën me më shumë raketa Patriot, Trump dha një përgjigje pozitive: “Ata do të kenë nevojë për to për mbrojtje… Do t’u duhet diçka sepse po goditen mjaft fort”. Trump vlerësoi efikasitetin e raketave Patriot, duke e quajtur armën “të mahnitshme”.
Për presidentin Volodymyr Zelenskiy biseda e fundit me presidentin Trump këtë javë ishte më e mira dhe “më produktivja” që ka pasur.
“Diskutuam çështje të mbrojtjes ajrore dhe jam mirënjohës për gatishmërinë për të ndihmuar. Sistemi Patriot është pikërisht çelësi i mbrojtjes kundër kërcënimeve balistike”, tha Zelenskiy.
