“Do të jetë një buxhet i vështirë. Do të vendosim shkurtime të shpenzimeve tona këtë vit dhe mendoj se një gjë e tillë është e vonuar shumë”, kështu u shpreh këshilltari ekonomik i Shtëpisë së Bardhë, Larry Kudlow.
Ai deklaroi se Presidenti Donald Trump do të kërkojë 5 për qind shkurtime të shpenzimeve të brendshme të qeverisë për vitin 2020 kur të propozojë buxhetin e tij të ri të hënën. Këshilltari tha se ai pret dhe beson se do të ketë një luftë të re mbi financimin e murit kufitar.
Kujtojmë se një nga diskutimet më të bujshme lidhur me çështjet e ekonomisë u përqendrua në kërkesën e presidentit Trump për më shumë se 5 miliardë dollarë për ndërtimin e një muri përgjatë kufirit me Meksikën, i cili do të pengojë imigracionin e paligjshëm.
Pasi Kongresi hodhi poshtë kërkesën e tij Trump shpalli një emergjencë kombëtare për të anashkaluar autorizimin e kongresit për të mbledhur fonde të caktuara për projekte të tjera për të ndërtuar murin. Kongresi tani po shqyrton mundësinë e revokimit të shpalljes së emergjencës dhe 16 shtete e kanë hedhur në gjyq qeverinë.
Trump do të kërkojë të paktën 8.6 miliardë dollarë në financimin e murit të ri në buxhetin e vitit 2020. Njoftimet thonë se shkurtimet e buxhetit nuk do të ndikojnë programet popullore që sigurojnë fonde për kujdesin shëndetësor dhe pensionet për amerikanët e moshuar, por do pakësojnë financime të tjera për programet e brendshme ndërsa do të nxisin shpenzimet e mbrojtjes./Opinion.al
