Sapo kam marrë një telefonatë nga Sekretarja Klinton.
Ajo na përgëzoi – është për ne – për fitoren tonë, dhe unë e përgëzova atë dhe familjen e saj për një fushatë shumë, shumë të luftuar. Dua të them, ajo luftoi shumë fort.
Hillary ka punuar shumë gjatë dhe shumë fort përgjatë gjithë kësaj kohe, dhe i detyrohemi asaj një borxh të madh mirënjohjeje për shërbimin që ka bërë për vendin tonë.
I them shumë sinqerisht këto fjalë.
Tani është koha që Amerika të shërojë plagët e përcarjes; duhet të bashkohemi. Të gjithë republikanëve, demokratëve dhe të pavarurve në të gjithë vendin, u them që është koha të bashkohemi si një popull.
Eshtë koha. I betohem cdo qytetari të vendit tonë, se unë do të jem president për të gjithë amerikanët, dhe kjo është shumë e rëndësishme për mua.
Për ata që kanë zgjedhur të mos më mbështesin në të kaluarën, që janë pak njerëz… (të qeshura).
… Unë ju shtrij dorën, për ndihmën tuaj, me qëllim që të punojmë së bashku për të bashkuar kombin tonë të madh.
Siç e kam thënë që në fillim, e jona nuk ishte një fushatë, por një lëvizje e pabesueshme dhe e madhe, e përbërë nga miliona burra dhe gra punëtorë, që e duan vendin e tyre dhe duan një të ardhme më të mirë, më të ndritur për veten dhe familjet e tyre.
Eshtë një lëvizje e përbërë nga amerikanë të të gjitha racave, feve dhe besimeve, që duan dhe presin nga qeveria jonë që t’u shërbejë njerëzve, dhe ajo njerëzve do u shërbejë.
Duke punuar së bashku, ne do të fillojmë detyrën urgjente të rinërtimit të kombit tonë dhe ribërjes së ëndrrës amerikane. Unë kam kaluar të gjithë jetën dhe biznesin tim, duke kërkuar për potencialin e pashfrytëzuar në projekte dhe në popuj kudo në botë. Këtë gjë dua të bëj tani për vendin tim.
Potencial i jashtëzakonshëm. Kam arritur ta njoh vendin tonë kaq mirë – ka një potencial të jashtëzakonshëm. Do të jetë një gjë e bukur. Gjithësecili amerikan do të ketë shansin që të realizojë potencialin e tij. Burrat dhe gratë e harruar të vendin tonë, nuk do të jenë më të harruar.
Ne do të rregullojmë qytetet tona dhe do të rindërtojmë autostradat, urat, tunelet, aeroportet, shkollat, spitalet. Do të rindërtojmë infrastrukturën, e cila do të jetë e para mbi të gjitha. Dhe ndërkohë që e ndërtojmë, do të punësojmë njerëzit tanë.
Ne gjithashtu do të kujdesemi, më në fund, për veteranët tanë.
Ata kanë qenë kaq besnikë, dhe gjatë udhëtimit tim 18-mujor unë kam njohur kaq shumë prej tyre. Koha që kam kaluar me ta gjatë kësaj fushate, ka qenë ndër nderet më të mëdhenj për mua. Veteranët tanë janë njerëz të jashtëzakonshëm. Ne do të nisim një projekt rritjeje dhe rimëkëmbjeje kombëtare. Unë do të shfrytëzoj talentin krijues të popullit tonë dhe do u bëj thirrje më të mirëve dhe më të shkëlqyeshmëve, që të vënë talentin e tyre në funksion të të mirës së të gjithëve. Do të ndodhë.
Ne kemi një plan të madh ekonomik. Ne do të dyfishojmë rritjen ekonomike dhe do të kemi ekonominë më të fortë në botë. Në të njëjtën kohë, do të shkojmë mirë me kombet e tjerë që janë të gatshëm të shkojnë mirë me ne. Do ta bëjmë.
Do të kemi marrëdhënie shmë të mira. Presim të kemi marrëdhënie shumë të mira. Asnjë ëndërr nuk është shumë e madhe për t’u arritur, asnjë sfidë nuk është shumë e madhe për t’u kapërcyer.
Asgjë që duam për të ardhmen tonë nuk është e paarritshme.
Amerika nuk do të pranojë më asgjë më pak se sa më të mirën.
Ne do të rimarrim në duar fatin e kombit tonë dhe do të ëndërrojmë gjëra të mëdha, dhe do të ëndërrojmë me guxim. Duhet ta bëjmë. Ne do të ëndërrojmë përsëri për gjëra të bukura dhe të suksesshme për vendin tonë.
Unë dua t’i them komunitetit botëror se, ndërkohë që gjithmonë do të vëmë në plan të parë interesat e Amerikës, ne do të jemi të drejtë me këdo – të gjithë popujt dhe të gjithë kombet. Do të kërkojmë të përbashkëtat, jo armiqësinë; partneritetin, jo konfliktin.
Dhe tani dua ta shfrytëzoj këtë moment, për të falënderuar disa prej njerëzve që vërtetë më kanë ndihmuar, në këtë që, sonte po e quajnë një fitore shumë, shumë historike.
Së pari, dua të falënderoj prindërit e mi, të cilët në këtë moment po më shohin nga atje lart.
Njerëz fantastikë. Kam mësuar shumë prej tyre. Ishin të mrekullushëm në të gjithë drejtimet. Kam patur prindër vërtetë fantastikë.
Dua gjithashtu të falënderoj motrat e mia, Maryanne dhe Elizabeth, që janë këtu me ne sonte. Dhe vëllanë tim, Robert. Të gjithë ata duhet të jenë në skenë. Dhe vëllanë tim, të ndjerin Fred. Një djalë fantastik.
Familje fantastike. Kam qenë shumë me fat. Vëllezër dhe motra të mrekullueshëm, prindër të jashtëzakonshëm.
*Fjalimi i fitores, i mbajtur nga Donald J. Trump
