Ministri i Drejtësisë Ulsi Manja kërkon nga autoritete zbardhjen sa më shpejt të shpërthimit me tritol të në banesën e gjyqtarit në Shkodër, Tonin Sterkaj.
Manja thotë se ky është një akt burracakësh që tenton të intimidojë drejtësinë. Më tej, Manja vlerëson figurën e gjyqtarit Sterkaj, me të cilin ka njohje që nga koha kur drejtonte Prokurorisë Shkodër, në vitet 2002-2007.
“Me Tonin Sterkajn më ka njohur puna si drejtues i Prokurorisë Shkodër, gjatë viteve 2002-2007 dhe miqësinë tonë të atyre kohëve të vështira e kemi pasurinë tonë më të madhe. Si mik dhe si koleg, sot, i kam shprehur Toninit dhe familjes së tij gjithë mbështetjen time! Si Ministër i Drejtësisë, kërkoj nga organet kompetente të zbardhin sa më parë këtë akt të shëmtuar prej burracakësh që kërkon të intimidojë drejtësinë, por që nuk do ia arrijnë dot, aq më tepër me Tonin Sterkajn, gjyqtarin më të vjetër e më me përvojë që ka sistemi i drejtësisë sot në juridiksionin e shkallës së parë! Sot jam në krah të Toninit dhe familjes së tij dhe jam i bindur se drejtësia do triumfojë dhe në këtë rast!”, shprehet Manja.
