Një shpërthim me tritol ka ndodhur në Tiranë, në banesën e 65-vjeçarit Muhamed Duka, babai i vëllezërve Duka. Njëri prej tyre, Leonard Duka njihet edhe si kundërshtari i Ervis Martinajt.
“Më datë 18.04.2023, reth orës 03:00, te Fresku, në afërsi të Insitutit të Fizikës Bërthamore, në katin e katërt të një pallati, në derën e banesës së shtetasit M. D., 65 vjeç, dyshohet se ka shpërthyer një sasi lëndë plasëse”, njofton policia.
Leonard Duka u arrestua më 14 shkurt të këtij viti në Belgjikë, ndërkohë që dy vëllezërit ishin shpallur në kërkim për vrasjen e Santiago Malkos në 2019-ën. Santiago Malko ishte njeri i besuar i Ervis Martinajt, ndërsa dy vëllezërit Leonard dhe Elis Duka njihen nga policia si kundërshtarë të Martinajt.
Nga ana tjetër, deri më tani mbetet mister fati i Martinajt, i cili prej disa muajsh është zhdukur pa lënë gjurmë.
