Avokatja e Popullit Erinda Ballanca ka folur sot në Komisionin e Ligjeve në lidhje me tre vdekjet e ndodhur në komisariatet e vendin në 2 muajt e fundit.
Avokatja u pyet nga deputeti i PD Enkelejd Alibeaj, për masat që janë marrë dhe konkluzionet e nxjerra për secilin rast.
Ajo u shpreh se gjendja në Komisariatet e Tiranës dhe në një pjesë tjetër të vendit është katastrofike. Ndër të tjera avokatja tha se është kërkuar mbyllja e një numri të madh të tyre.
Lidhur me komisariatin e Kamzës, ku humbi jetën i riu Arben Mici Ballanca deklaroi se dhomat ku ra zjarri, duhet të mbaheshin të mbyllura. Ndërsa për vetëvrasjen e Ilvi Metës në Kavajë, Ballanca tha se deri më tani nuk ka indicie se personi është vrarë nga ana e policisë, ashtu siç pretendojnë familjarët.
“Gjendja në komisariatet e Tiranës në mënyrë të veçantë dhe një pjesë tjetër është katastrofike. Është në kundërshtim me standardet për qëndrimin e personave të privuar nga liria. CPT ka kërkuar mbylljen e një numri të madh komisariatesh. Janë mbyllur dhomat e sigurisë te 1 dhe 2 për shkak të kushteve të këqija dhe kur ne kemi shkuar më vonë i kemi parë të hapur. Është ndërtuar blloku i ri i dhomave të sigurisë në Tiranë.
Ai do të zgjidhë në mënyrë afatshkurtër nevojën dhe qëndrimin e personave në kushtet e sigurisë me kapacitet tjetër. Kemi bërë rekomandimin përkatës. Për rastin e Kamzës ato dhoma duhet të ishin të mbyllura. E kam marrë edhe Veliun në telefon i kam thënë si ka mundësi t’i çoni njerëzit në ato biruca. Dhe na tha ku t’i çojmë se ju na keni thënë. Unë kam bërë edhe takim me zotin Nano për këtë çështje. Sa i përket rastit të Kavajës, Kavaja është i rikonstruktuar.
Dhe aty skara e hekurit nuk është në përputhje me rregulloren. Shqetësimi që ne kemi është se kushtet nuk janë në standardet e parashikuara në rregullore. Në rastin e zotit Meta unë kam një komisioner që është specialist i kësaj fushe. Ai ka qenë vetë në komisariat dhe në gjykimin e tij nuk ka deri më tani indicie që personi është vrarë nga ana e policisë. Për rastin e vrasjes në komisariat nuk kemi nisur një hetim”,-tha Ballanca.
