Tre të plagosurit në Rrëshen u transportuan drejt Spitalit të Traumës. Ata mbetën të lënduar pas atentatit në Rrëshen paraditen e sotme, ku si pasojë mbeti i vrarë Martin Bardhi.
Sipas tvklan.al, të plagosurit morën mjekim në spitalin e Lezhës dhe më pas u sollën drejt Tiranës, për trajtim më të specializuar. Mësohet se një prej tyre rrezikon të humbasë krahun (amputim). I plagosuri tjetër ka marrë dëmtime në mushkëri e mëlçi, ndërsa tjetri në mushkëri.
Ilir Bardhoku, Olti Gjini, Indrit Bardhi ndodheshin të 3 të ulur në një tavolinë me Martin (Marku) Bardhin, kur në drejtim të tyre u qëllua me breshëri automatiku.
Nga të shtënat mbeti i vrarë 59-vjeçari Martin (Marku) Bardhi, i cili sipas të gjitha të dhënave ishte dhe objektiv i këtij atentati.
Ngjarja e rëndë ndodhi rreth orës 10:40 në lokalin e viktimës që ndodhet në qendër të Rrëshenit.
Sa i përket autorëve, ata dyshohet se ishin 2 persona të maskuar, të cilët lëviznin me një fuoristradë që u gjet e djegur në fshatin Gëziq të Mirditës. Dëshmitarë nga vendi i ngjarjes thanë se autorët qëlluan me breshëri automatiku në drejtim të tavolinës dhe vijuan të qëllonin edhe teksa largoheshin.
