Kuvendi do të nis sot seancën e radhës në orën 10:00 ku janë parashikuar edhe tre interpelanca.
Në të parën është thirrur ministri i Brendshëm, Sandër Lleshaj nga deputeti Artur Roshi. Ministrit do ti kërkohen informacion në lidhje me ekstradimin e mësuesit turk Harun Çelik i cili u dëbua muajin e kaluar nga Shqipëria dhe për këtë pati reagim ndërkombëtar pasi atij i rrezikohet jeta në Turqi.
Interpelanca e dytë është thirrur nga një grup deputetësh me në krye Lefter Maliqin të cilët do të pyesin ministren e drejtësisë Etlida Gjonaj në lidhje me situatës sipas tyre të rënduar në burgje, emërimet, shkarkimet dhe kriteret e përdorura për to.
Interpelanca e tretë është thirrur po nga deputetët e opozitës së re me ministrin Klosi për dëmtimet serioze të sipërfaqeve të mëdha pyjore halore në rrethin e Korçës, Kolonjës, Pukës, Mirditës, Peshkopisë nga proçesionaria, shkatërruesja e tyre e pamëshirshme, e cila sipas tyre ka tharë me mijëra pisha dhe rrezikon mijëra të tjera.
Në orën 15:00 në seancën plenare do të mbajë një fjalim Presidenti i Parlamentit Europian, David Sassoli. /Opinion.al
