Pesë persona janë arrestuar nga policia në Tiranë, pasi shisnin kokainë. Policia bën me dije se të arrestuarit e transportonin lëndën narkotike nga Laçi për ta shitur në Tiranë.
Në prangat e policisë ranë Gj. D., 36 vjeç, banues në Laç, M. P., 44 vjeç, banues në Mamurras, A. L., 25 vjeç, banues në Fushë Kuqe/Patok, A. N.,23 vjeç, banues në Fushë Kuqe/Patok, E. D., 28 vjeçe, banuese në Laç.
Të pestë këta persona në bashkëpunim me njëri-tjetrin zhvillonin tregtinë e kokainës.
Në kuadër të operacionit të koduar “Stafeta”, policia ndaloi dy automjete në rrugën e “Valiasit” në Kamëz,ku në njërin nga automjetet ishte fshehur 249.2 gramë lëndë narkotike e llojit kokainë.
Në cilësinë e provës materiale policia sekuestroi sasinë e kokainës, dy automjete si dhe 6 aparate celularë. Mbi pesë të arrestuarit rëndon akuza e “Prodhimit dhe shitjes së lëndëve narkotike në bashkëpunim”.
Ndërkohë, autoritetet po punojnë për zbardhjen e plotë të rrjetit i cili zhvillonte tregtinë e kokainës./ Opinion.al E.Xh.
