Në pritje të nisjes së vitit të ri shkollor 2016-2017 një nga problemet më të mëdha të prindërve në Tiranë është transporti i fëmijëve në shkollë. Aktualisht, prindërit kontaktojnë shoferët e furgonëve që kanë të regjistruara mjetet e tyre për transport udhëtarësh. Por, asnjëri prej tyre nuk është i identifikuar si mjet për transport nxënësish. Prindërit paguajnë në të zezë, shumën e parave që kërkojnë drejtuesit e mjeteve. Shumë prej tyre mbajnë fëmijë jashtë vendeve. Por edhe vetë drejtuesit kanë ankesa. Ata thonë se nuk kanë stacione dhe as vende parkimi dhe për këtë gjobiten çdo ditë nga Rrugorët.
Për të gjitha problemet që lindin nga ky shërbim informal ne iu drejtuam Bashkisë së Tiranës me një sërë pyetjesh.
Ky institucion nuk ka të evidentuar mjetet e transportit që përdoren për fëmijët, nuk ka informacion as për numrin e nxënësve në Tiranë që përdorin mjetet e transportit.
Më poshtë keni përgjigjet e zyrës së medias në Bashkinë e Tiranës. Siç shihet qartë bashkia është mjaftuar duke marrë udhëzimin e një viti më parë dhe duke e copëzuar në formë përgjigjesh.
Ndërkohë një sërë pyetjesh të tjera nuk kanë marrë përgjigje me argumentin se nuk janë pjesë e kompetencave të bashkisë.
Pyetje: Kush i cakton rregullat e transportit të nxënësve në shkollat e Tiranës (qytet dhe fshat). Nëse i ka hartuar Bashkia, cilat janë ato?
Përgjigje: Plani i lëvizjes së automjeteve në qytetin e Tiranës:
– Kufizim 24 orë i mjeteve në brendësi të unazës së vogël, përveç veturave, urgjencave, zjarrfikësit dhe autobusëve urban.
-Nga ora 06.00 – 09.00 dhe 16.00 – 20.00. Ndalohet qarkullimi i të gjitha mjeteve të transportit të mallrave.
– Nga 6.00 – 20.00 Ndalohet qarkullimi i mjeteve me ngarkesë të përgjithshme mbi 3.5 ton (në Unazën e mesme të qytetit, në brendësi të saj, si dhe në rrugët Sulejman Delvina, Abdyl Frashëri, Ismail Qemali, Elbasanit dhe Blv Bajram Curri).
-Nga ora 6.00 – 20.00. Ndalohet qarkullimi i mjeteve me ngarkesë të përgjithshme mbi 18 ton (në brendësi të unazës së madhe të qytetit, si dhe në akset kryesore hyrëse në të).
-Nga ora 6.00 – 20.00. Ndalohet qarkullimi i mjeteve me ngarkesë të përgjithshme deri në 25 ton (në akset kryesore hyrëse në qytet).
-Nga ora 20.00 – 06.00. Subjektet tregtare mund të kryejnë veprimtarinë e tyre furnizuese.
Pyetje: A janë të licensuara mjetet e transportit shkollor në Tiranë?
Pa përgjigje…
A kanë ato shenja dalluese (ngjyrë, sinjale)?
Masat për transportin e nxënësve me autobusë shkollor: Të vendoset sinjali rrugor “autobus shkolle”, në të gjitha rrugët e qytetit, buzë trotuareve në afërsi të shkollave.
– Autobusët që trasportojnë nxënësit në shkollë identifikohen me simbolin sinjalistik përkatës, i vendosur në katër anët e autobusit, përpara anash dhe pas.
– Simbolet sinjalistike dhe logoja, të jenë mbi mjetin e lyer tërësisht, me ngjyrë të verdhë në portokalli.
– Lyerja e mjeteve dhe vendosja e shenjave dalluese, të bëhen brenda 30-ditëve nga hyrja në fuqi e këtij Urdhëri.
– Çdo mjet shkollor lejohet të përdorë korsitë e dedikuara për Autobusët Urban Qytetës.
Pyetje: Kush e kontrollon numrin e pasagjerëve (fëmijëve) që transportojnë furgonët e shkollave?
Policia Bashkiake ne bashkepunim me Policine Rrugore.
Ku janë stacionet? Ku qendrojnë këto mjete në momentin që duhet të lënë nxënësit në shkolla? A ka caktuar bashkia vendet e posaçme (parkimet e përkohshme)?
Bashkia e Tiranës ka vendosur tabela që lejojnë ndalimin e furgonëve që transportojnë fëmijet, në hyrje të çdo shkolle.
Kush i mbledh taksat për këtë lloj shërbimi? Kush i kontrollon tarifat që paguajnë prindërit?
Pa përgjigje….
Cila është bashkëpunimi juaj me Ministrinë e Transporteve dhe Policinë Rrugore për këtë shërbim shkollor?
Policia Bashkiake dhe Policia Rrugore bashkepunojne per te kontrolluar respektimin e masave te vendosura nga bashkia.
A keni ju një shifër? Sa janë nxënësit që shkojnë në shkollë me furgonë, mikrobus, etj. Po numri i mjeteve sa është?
Pa përgjigje…
/Riviera Dedaj-Opinion.al
