Kompania e kontraktuar për asistencë në dogana, Crown Agents është paguar nga qeveria shqiptare gjatë 2014-2015 me 6.8 milionë euro, sipas të dhënave të detajuara të thesarit të përpunuara nga Open Spending Data. Nga kjo shumë rreth 553 milionë lekë (rreth 4 milionë euro) janë paguar gjatë vitit 2014 dhe 388 milionë lekë (rreth 2.8 milionë euro) të tjera gjatë vitit 2015. Kompania kishte një kontratë dy vjeçare, që përfundoi në 8 shkurt dhe nuk u rinovua më, ndonëse në të kishte dhe një klauzolë mundësie shtyrjeje edhe për një vit tjetër.
Nga ana tjetër Crown Agents fakton se ka ndikuar në rritjen e të ardhurave përgjatë dy viteve vetëm nga aksionet e veta në terren me 32 milionë euro.
“Bazuar në gjetjet tona vlerësojmë se kemi identifikuar përafërsisht 32 milionë euro të ardhura dhe gjoba. Kjo shifër është pothuajse katër herë më e lartë se vlera e kontratës tonë” sqaron Crown Agents në faqen e saj zyrtare në internet.
Sipas këtyre të dhënave kompania ka marrë deri tani 25% të shumës që sipas saj ka sjellë tepër në buxhet, vlerë kjo mjaft e lartë krahasuar me kostot e administratës shtetërore për mbledhjen e detyrimeve fiskale. Vlerësohet se shpenzimet e administratës tatimore dhe doganore si përqindje e të ardhurave ishin 2 për qind në vitin 2015, sipas një analize të reporter.al (259 miliardë lekë të arhdura nga tatimet e doganat në vitin 2015, kundrejt 3.7 miliardë lekë të zërit Menaxhimi i të Ardhurave Tatimore dhe Menaxhimi i të Ardhurave Doganore), ndërkohë që një raport i OECD për Eficencën e Administrimit Fiskal tregon se në vendet anëtare, administrimi i mbledhjes së taksave kushton mesatarisht 0.99 për qind e totalit të taksave të mbledhura.
Ministri i Financave, Shkëlqim Cani, ka thënë më 12 nëntor të vitit 2013 në Komisionin e Ekonomisë se “treguesit e performancës do t’i kushtëzojnë pagesën nga ana e qeverisë shqiptare kompanisë Crown Agents deri në 25%. Ndërkohë deri në 10% e pagesës kushtëzohet me objektivin e përcaktuar që të ardhurat nga të doganat të arrijnë jo më pak se 90 milionë euro në vit”.
E konceptuar si një kontratë konsulence e ndërthurur me aksione në terren, britanikët e Crown Agents do të fitonin pagesa 8.5 milionë euro në dy vitet e para të aktivitetit, plus 400 mijë euro për makina dhe të tjera pagesa për zyrat dhe infrastrukturën operacionale në Shqipëri. Deri tani, kompania ka marrë rreth 70% të pagesës që duhej bërë sipas kontratës.
Crown Agents nuk përmbushi detyrimin kontraktor me qeverinë shqiptare që kërkonte që të ardhurat doganore të rriteshin për një vit fiskal jo më pak se 90 milionë euro.
Ministria e Financave ka pohuar se puna e Crown nuk lidhej vetëm me të ardhurat, por edhe me standardet që u përvetësuan. (Lexo: Crown agents mbaron kontrata financiare, tani vazhdojme vete pervojen e morem).
Kompania nga ana e saj ka deklaruar se objektivat e saj u përmbushën dhe u tejkaluan. (Lexo: Crown agents, kontrata mbaroi, permbushem dhe tejkaluam objektivat).
Pagesat sipas kontratës
Për qëllimet e kryerjes së shërbimeve, qeveria ia ka ofruar kontraktuesit pa pagesë, duke nisur nga data e fillimit të shërbimit, zyrat, automjetet, pajisjet dhe lehtësitë e tjera të përcaktuara në shtojcën B, e cila nuk është bërë publike dhe nuk është e botuar në QPZ.
Vlera totale e tarifave dhe shpenzimeve të drejtpërdrejta për vitin e parë, sipas kontratës, nuk do të kalonte shumën 4,250,000 euro (katër milionë e dyqind e pesëdhjetë mijë euro), plus koston e furnizimit dhe vënies në përdorim të 10 (dhjetë) automjeteve operacionale (deri në një shumë limit prej 400.000 eurosh).
Vlera e përgjithshme e tarifave dhe e shpenzimeve të drejtpërdrejta për vitin e dytë të kontratës nuk do të kalojë shumën 4,250,000 euro (katër milionë e dyqind e pesëdhjetë mijë euro)./Monitor
