Ajo që përflitej ditët e fundit në formë thashetheme, tashmë po bëhet fakt, sepse zëvendëstrajneri i Shqipërisë Paolo Tramexani po shihet gjithnjë e më shumë si zgjedhja e Luganos për sezonin e ardhshëm.
45-vjeçari është lavdëruar shpesh nga Xhani De Biazi, i cili e ka ndihmësin e tij besnik prej vitesh, por duket se tashmë Tramexani po mendon të “fluturojë” i vetëm, duke tentuar edhe karrierën e trajnerit. SkySport në Itali e ka bërë të sigurt emërimin e Tramexanit në vendin e lënë bosh nga Zdenek Zeman, por nga Zvicra nuk ka ende konfirmim zyrtar.
Sipas medieve zvicerane, Tramexani është në listë, por është ende “kokë më kokë” me ishfutbollistin e famshëm zviceran Çiriako Sforca.Nuk duhet harruar edhe diçka tjetër: ashtu si De Biazi, edhe Tramexani është nën kontratë me Shqipërinë, por vështirë se Federata jonë do ta ndalë, nëse Lugano i bën ofertë zyrtare.
