Ndihmës trajneri i Shqipërisë, Paolo Tramezzani, beson se disa nga futbollistët aktualë të Shqipërisë mund të luajnë në Itali në të ardhmen.
Paolo Tramezzani është shprehur i kënaqur me paraqitjen e Shqipërisë në “Euro 2016”, ndërsa shpreson që Italia t’u ndihmojë atyre që të kualifikohen tutje.
Madje, ndihmësi i De Biasit ka deklaruar se lojtar si Roshi, Kaçe e Cikalleshi, kanë potencial që të luajnë në Itali në të ardhmen.
“Ne jemi shumë të kënaqur me këto tri ndeshje të luajtura, të gjitha kundër kundërshtarësh më të fortë në letër. Jemi një ekip me zemër të madhe, që kurrë nuk heq dorë. Kjo përvojë do të na bëjë të rritemi.
Shpresoj edhe tek Italia, që mund të na japë një dorë. Jemi të lumtur që puna e trajnerit De Biazi është bërë e njohur edhe jashtë vendit tashmë. Kemi lojtarë me cilësi, që garantojnë një të ardhme të mirë. Doni ndonjë emër? Roshi, Kaçe dhe Cikalleshi, janë emrat e ardhshëm, të denjë për ekipe të nivelit të lartë. Ndoshta do t’i shohim në të ardhmen në Itali”, deklaroi italiani.
