Presidenti i Federatës Shqiptare të Futbollit Armand Duka ka pranuar se mbrëmjen e djeshme ka takuar trajnerin italian Edi Reja në “Loro Boriçi”, por thotë se takimi nuk kishte lidhje me zëvendësimin e Christian Panucci-t.
“Nuk mund të them asgjë për Edi Rejan për momentin. E kam takuar rastësisht në stadium mbrëmë”, ka thënë Duka për “News 24”, duke e lënë të hapur çështjen e trajnerit të ardhshëm të Kombëtares. Ai është shprehur se tani gjithë vëmendja është tek ndeshja me Andorën dhe se ëndrra për kualifikim në Europianin 2020 vazhdon.
Christian Panucci u shkarkua nga FSHF pas humbjes së djeshme me Turqinë, ndërsa sot ai është larguar drejt Italisë. Nga ana tjetër, mediat raportuan një takim mes Dukës dhe trajnerit Reja, duke aluduar për emërim e këtij të fundit në krye të stolit kuqezi./Opinion.al
