Një operacion antidrogë është zhvilluar nga policia belge, kundër një grupi kriminal, i cili merrej me trafikun e kanabisit, ndërsa në pranga përfunduan 18 persona shumica shqiptarë.
Mediat e huaja bëjnë me dije se pas një hetimi të nisur më shumë se dy vjet më parë në mjedisin kriminal shqiptar lidhur me trafikun e kokainës dhe kanabisit, autoritetet kryen një operacion në shkallë të gjerë ku përfshiheshin më shumë se 160 policë, njoftoi këtë të martë Prokurori Publik i Lièges.
Në total u ushtruan 21 kontrolle dhe policia mundi të sekuestrojë 600 rrënjë kanabis dhe 800 gramë kokainë dhe produkte prerëse të paketuara në një arkë që shërbenin si “punishte” për të dyshuarit.
“Aksioni bëri të mundur konfirmimin e ekzistencës së një trafiku të mirëorganizuar të kokainës dhe kanabisit në një periudhë të paktën katërvjeçare”, tha Prokurori i çështjes.
Gjithashtu, janë konfiskuar llogari bankare me vlerë afro 70,000€, 33 automjete të cilat dyshohet se janë përdorur nga autorët, ku vlera e tyre i kalon 300,000 euro, si dhe u sekuestrua edhe një orë Rolex apo dhe sende të tjera luksi.
Mësohet se droga grumbullohej në Antëerp dhe Holandë, ku policia ka arritur të sekuestrojë edhe sasinë e kokainës.
