Vetëm në dy funksionim, grupi i trafikantëve që kryen kalimin e paligjshëm të shqiptarëve nga Meksika në Shtetet e Bashkuara të Amerikës, ka mundur të sigurojë nga ky trafik afërsisht 15 milion dollarë.
Ky lajm bëhet i dituar nga Ambasada e Shteteve të Bashkuara të Amerikës në Tiranës, të cilët pasi kanë vlerësuar dënimin e djeshëm të pesë personave për kontrabandë të qënieve njerëzore, përmes mashtrimit për dërgim në Amerikë, shkruan në profilin e saj në fb se: “Organizata kriminale ku ata bëjnë pjesë është përgjegjëse për hyrjen e paligjshme në Shtetet e Bashkuara të më shumë se 600 shtetasve shqiptarë gjatë periudhës së shkurtër që ishte në veprim. Ajo shfrytëzoi shpresat dhe ëndrrat e emigrantëve të mundshëm, duke i vënë ata në rrezik ndërsa siguroi mbi 15 milionë dollarë si të ardhura kriminale”
Hetimi për grupin e trafikantëve ishte rezultat i punës së përbashkët të disa agjencive nën udhëheqjen e Byrosë për Sigurinë Diplomatike në Departamentin e Shtetit, në bashkëpunim të ngushtë me Policinë e Shtetit Shqiptar dhe Zyrën e Prokurorisë së Krimeve të Rënda.
Grupi i trafikantëve u dënua në total me 59 vite heqje lirie.
Gjykata ka pranuar si të provuara pretendimet e Prokurorisë për Krimet e Rënda se të pandehurit kanë ndihmuar kalimin e gati 100 personave kundrejt shpërblimeve që varionin 24 25 mijë dollarë për person.
Përfundimisht gjykata dha dënim me 14 vjet burg për të pandehurin Fatos Fasko dhe 13 vjet për të pandehurin Enver Karaj.
Për të pandehurit Nertil Previzi dhe Fatmir Bakalli gjykata vendosi dënim me nga 11 vjet e 6 muaj burg, ndërsa për të pandehurin Nikoll Kolaj 9 vjet burg.
Sipas Prokurorisë, veprimtaria e të pandehurve shtrihet që në muajin dhjetor të vitit 2013 e në vijim, dhe konsiston në organizimin e emigracionit të paligjshëm me destinacion SHBA.
