Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka çuar për gjykim dosjen penale nr. 108 të vitit 2024 ndaj dy të pandehurve kryesorë të një grupi të strukturuar kriminal që merrej me trafikimin ndërkombëtar të lëndëve narkotike.
Në bankën e të akuzuarve do të ulen Gëzim Bakalli (i njohur edhe me identitetin Shkëmbim Cërmanji) dhe Erjon Loci, të cilët, sipas SPAK, kanë qenë pjesë aktive e një grupi ndërkombëtar të trafikut të drogës që operonte mes Amerikës Latine, Gjermanisë dhe Zvicrës, përmes Shqipërisë.
Akuzat ndaj Gëzim Bakallit:
Sipas hetimeve, Bakalli ka qenë drejtues dhe financues i aktivitetit kriminal në 15 episode të ndryshme të trafikimit të drogës, të kryera nga një grup i strukturuar kriminal. Ai akuzohet për:
Trafikim të lëndëve narkotike në formë të përsëritur dhe në bashkëpunim (nenet 283/a/2, 28/4, 334/1)
Drejtim të grupit të strukturuar kriminal (neni 333/a/1)
Falsifikim të dokumenteve zyrtare: pasaportë, patentë dhe kartë identiteti kosovare
Akuzat ndaj Erjon Locit:
Loci akuzohet për pjesëmarrje në grupin kriminal dhe përfshirje në prodhimin dhe shitjen e lëndëve narkotike në të paktën 6 episode. Ai dyshohet se ka ndihmuar në transportimin dhe shpërndarjen e drogës në territorin zviceran.
Hetimi ndërkombëtar dhe sekuestrimet:
Procedimi penal është zhvilluar në bashkëpunim të ngushtë me autoritetet zvicerane, Byronë Kombëtare të Hetimit dhe Policinë e Shtetit. Hetimet janë kryer përmes metodave speciale, përfshirë përgjimet në aplikacionet e enkriptuara “Sky ECC”, “Threema” dhe “Signal”.
Si rezultat i operacionit të përbashkët janë sekuestruar:
345.4 kg kokainë (pastërti nga 86.9% në 44.2%)
22.25 kg heroinë (pastërti nga 62% në 30.7%)
1 kg kokainë (në tentativë)
2 kg marijuanë
10,000 tableta ecstasy
2 armë zjarri (SIG 210 dhe SIG 220), municion luftarak
Aksesorë luksi: një orë “Rolex” dhe një “Hublot”
6 telefona celularë, pajisje regjistruese, kapuçë maskimi
Dokumente pasurish dhe kontrata të dyshimta
Hetimet vijojnë për persona të tjerë
Me qëllim zbardhjen e plotë të rrjetit kriminal dhe identifikimin e bashkëpunëtorëve të tjerë, SPAK ka vendosur të ndajë një pjesë të hetimeve në një procedim të ri penal nr. 108/1 i vitit 2025, për të cilin hetimet janë ende në vijim.
Grupi, sipas SPAK, ka operuar në mënyrë të organizuar ndër vite (2018–2024) duke trafikuar dhe tregtuar sasira të mëdha droge në Zvicër dhe vende të tjera europiane.
