Dy kushërinj shqiptarë Alfred dhe Elvis Vladi janë shpallur në kërkim nga autoritetet blege në lidhje me çështjen “Toyota Yaris” ku u gjetën 3.5 milion euro të fshehura në dy automjete në portin e Durrësit.
Lajmi bëhet i ditur nga mediumi belg “HLN”. Në artikull shkruhet se policia federale ka vënë në kërkim dy shqiptarët dhe thekson se ata “mund të jenë shumë të rrezikshëm”.
Qershorin e kaluar autoritetet në Shqipëri zbuluan 3,366,700 euro dhe 80 mijë franga zvicerane brenda dy automjeteve Toyota Yaris të cilat ishin në një kontenier me 9 makina që vinin nga Belgjika.
Për këtë çështje ka dëshmuar rreth një javë më parë në Prokurorinë e Krimeve të Rënda, në praninë e prokurorëve belg edhe kreu i opozitës Lulzim Basha. Ai u pyet pasi në një nga seancat plenare duke reaguar ndaj socialistëve të cilët nisën të qeshnin me fjalën e tij, iu drejtua kreut të Grupit socialist Taulant Balla: “njëri prej atyre që zgërdhihen më shumë ka qenë në Gjermani para tre ditësh. Mbajeni mend këtë që po ju them. Dhe ka porositur një Toyota Yaris, por ta kanë zbuluar Toyotën, o zgërdhimtar, bashkë me 1.5 milion euro të drogës brenda”.
Në një deklaratë për mediat në dalje të prokurorisë Basha tha se kishte dhënë informacione në lidhje me çështjen “Toyota Yaris”, madje më shumë se ato që ka dhënë në publik.
Për këtë çështje Gjykata e Apelit për Krimet e Rënda ka lënë në fuqi masën e sigurisë arrest me burg për katër persona të arrestuar, Edi Lika, Klevi Lika, Arben Ceka dhe Alban Mollaymeri, të cilët akuzohen për pastrim parash, armëmbajtje pa leje, falsifikim të monedhave dhe grup të strukturuar kriminal. /Opinion.al
