Lamtumira e Francesco Totti nga futbolli i luajtur është gjithnjë dhe më afër. Kapiteni verdhukuq dhe klubi janë shumë larg, duke parë se nuk po zhvillohet asnjë negociatë për rinovimin e kontratës, që skadon më 30 qershor.
Totti i ka bërë të ditur klubit se do të ishte i gatshëm të vazhdonte të luante falas, por Roma ka zgjedhur, me përjashtim të surprizave, që të mos zhvillojë asnjë negociatë.
Pavarësisht se drejtuesit i kanë përgënjeshtruar këto zëra, duket shumë e vështirë të parashikohet një e ardhme në fushën e lojës për kapitenin verdhekuq.
Për Pallottan, Totti duhet të ketë një rol drejtuesi. Për këtë arsye numri 10 i Romas po mendon të thotë lamtumirë fund të sezonit, pas 23 viteve të kaluara në Serinë A.
Do të jetë një lamtumirë ndaj klubit verdhekuq, por jo ndaj futbollit. Francesco dëshiron të luajë edhe 12 muaj
të tjerë, ndihet në gjendje ta bëjë këtë në aspektin fizik dhe është i gatshëm të vlerësojë ofertat që mund t’i vijnë nga jashtë Italisë (Emiratet Arabe apo Shtetet e Bashkuara, ideja e një transferimi në Kinë nuk e tërheq), gjithmonë nëse nuk ndryshon mendje në fund.
Ndoshta për të mos humbur mundësinë për të qenë pjesë e klubit italian në të ardhmen. Nëse ai vendos të largohet për të vazhduar karrierën si futbollist, ka pak mundësi që të gjejë një vend si drejtues kur të kthehet.
Roma, për momentin, nuk ka mbajtur asnjë qëndrim zyrtar, edhe pse Pallotta, Zanzi dhe Baldissoni janë në Boston.
Por reagimet kanë ardhur nga tifozët verdhekuq, të cilët kanë reaguar menjëherë, nëpërmjet rrjeteve sociale dhe radiove, pasi kanë mësuar për ofertën që kapiteni i ka bërë klubit.
Pjesa më e madhe e tyre janë në krah të Francescos dhe shpresojnë që kjo histori dashurie, pothuajse 25 vite e gjatë, të mos përfundojë në mënyrën më të keqe.
Edhe presidenti i Milan, Silvio Berlusconi, ka folur në favor të kapitenit të Romas: “Do të më kishte pëlqyer ta kisha pasur Tottin në ekip, por nuk kam kërkuar asnjëherë ta blej sepse flamujt nuk blihen dhe as nuk shiten”, ka thënë numri një i kuqezinjve.
