Dhuna në Jetimore është në masë dhe rasti i skandalit të Shkodrës duket se nuk është i izoluar. Avokati i Popullit, Igli Totozani prezantoi sot raportin për 9 qendrat e jetimëve në Shqipëri, ku tha se përmes intervistave është zbuluar se fëmijët dhunohen.
“Nga inspektimet e bëra në këto qendra rezulton se ndaj fëmijëve të institucionalizuar ka pasur raste të ushtrimit të dhunës fizike dhe psikologjike nga stafi dhe zyrtarët përgjegjës për mirëqenien e tyre. Ndaj nga ana e institucioneve përgjegjëse qeveritare qendrore dhe vendore është e nevojshme kryerja e reformave institucionale për përmirësimin e situatës së trajtimit të fëmijëve që rriten nën mbrojtjen e shtetit. Është domosdoshmëri që në këtë proces të përfshihen edhe organizata të shoqërisë civile që kanë mjaftueshëm eksperiencë në fushën e mbrojtjes së të drejtave të fëmijëve”, tha Totozani.
