Presidenti i Federatës Shqiptare të Futbollit, Armand Duka, foli për Klan News, në prag të ceremonisë “Topi i Artë 2024”, ku do të vlerësohen më të mirët e futbollit shqiptar.
Duka theksoi se ky është një event ndryshe për botën e futbollit dhe një ndërthurje me artin. Sipas tij, dhënia e çmimeve është një stimul për lojtarët, për atë që dhanë gjatë vitit.
“Ky event është një gjë ndryshe për botën e futbollit. Gjatë gjithë vitit jemi me organizimin e ndeshjeve, por edhe ky është emocion më vete. Ndërthurje e futbollit me artin. Për të finalizuar punën e vitit 2024. Për të stimuluar futbollistët dhe për t’i falenderuar për atë që dhanë gjatë vitit”, tha ai.
Duka deklaroi se synimet për vitin 2025 janë që të shkojmë sa më lart, duke thënë se viti që shkoi ishte i suksesshëm.
“Unë mendoj se kjo është më e bukura e asaj që kemi parë. Sa më lart të shkosh, aq më e vështirë bëhet. Ka qenë një vit i suksesshëm, me emocione pafund dhe që kulmoi me kualifikimin në Europianin në Gjermani. Përveç ekipit. Ishte një shfaqje edhe e tifozëve në shkallët e stadiumit. Në 2025 duhet të kemi synime për të shkuar më lart, në kompeticione më të vështira. Kemi Europianin për U-17 në Shqipëri. Kemi një mbledhje të KE të UEFA-s në shtator. Presim vendimin e UEFA-s për Europianin e U-21. Uroj të kemi më shumë rezultate pozitive.
Vlerësimet janë gjithmonë subjektive. Ky është një sport kolektiv dhe ai që duhet ta marrë trofeun është ekipi”, deklaroi Duka.
Ceremonia “Topi i Artë 2024”, do të transmetohet ekskluzivisht në TV Klan. /tvklan.al
