Gazeta britanike “The Telegraph” nëpërmjet një artikulli ka zbuluar se Toni Blerit i është ndaluar qëndrimi në ambasadat britanike në vende të ndryshme të botës, përfshirë këtu edhe Shqipërinë.
Sipas gazetës britanike, Bler ka përdorur burimet qeveritare jashtë vendit, si dhe u ka kërkuar informacione ambasadave në vende si Kanadaja, Shqipëria dhe Maqedonia. Ai madje ka marrë dhe dokumente qeveritare përfshirë dhe kabllograme.
Nisur nga kjo, atij i është ndaluar që të përdorë diplomatët për punë të tij tregtare.
Në artikullin e “The Telegraph” shkruhet se “Ministria e Jashtme e Britanisë ka kërkuar parandalimin e përdorimit të pa përshtatshëm dhe të shmanget perceptimi se Bler apo figura të tjera përfaqësojnë qeverinë britanike”.
Ministria e Jashtme ka sqaruar se ish-kryeministrat apo ish-ministrat mund të përdorin ambasadat vetëm nëse janë për biznes zyrtar.
Urdhri ka ardhur pasi “The Telegraph” zbuloi se Bler ka bërë miliona paund që prej largimit si kryeministër në vitin 2007. Pasuria e tij përllogaritet 60 milionë paund./ Express
