Infermierja dhe drejtoresha e Qendrës së Zhvillimit Social në Shkodër janë arrestuar këtë të mërkurë nga policia rajonale pasi akuzohen për shpërdorim detyre.
Në një njoftim për shtyp, Prokuroria e Shkodrës thotë se në bazë të hetimeve të kryera, “ka rezultuar se ndaj pacientëve me sëmundje të shëndetit mendor në këtë qendër është ushtruar dhunë sistematike”.
Një tjetër rast skandaloz që kanë zbuluar hetimet është gjithashtu, “se tre femra në moshë madhore, paciente në këtë Qendër, kanë qenë shtatëzanë dhe kanë abortuar në mënyrë të paligjshme. Ky rezultat ka dalë në bazë të akteve të ekspertimit mjekoligjor, të kërkuara nga ana e Prokurorisë së Shkodrës”.
Në bazë të hetimit të deritanishëm, Prokuroria e Shkodrës ka evidentuar si përgjegjës për trajtimin jo në mënyrën e duhur shtetaset Juliana Cepi, drejtoreshë e Qendrës, si edhe Aida Ymeraj, infermiere në këtë qendër. Ky vjen pas skandalit të publikuar vetëm pak kohë më parë, pas hetimeve të Prokurorisë Shkodër e cila zbuloi se në Shtëpinë e Fëmijës në këtë qytet 3 të mitura ishin abuzuar seksualisht.
