Në një kohë që Tirana po mundohet të zerojë borxhet e prapambetura, të tjera i shtohen. Vetëm pak ditë më parë, për llogari të klubit kryeqytetas, është regjistruar një padi në Gjykatën e Shkallës së Parë. Ish sulmuesi Mirel Çota pretendon prej Tiranës detyrimet e kontratës të firmosur më 11 qershor 2012, që shkojnë mbi 20 milionë lekë (të vjetër). Është pikërisht ky viti që librazhdasi iu bashkua bardhebluve, ndërsa për dy sezone mbrojti ngjyrat e kësaj fanelle. Sipas padisë së siguruar nga “Balkanweb”, Çota i kërkon palës së paditur, pra klubit të futbollit Tirana, që t’i japë 2.080.000 lekë, si pasojë e mosrespektimit së kontratës individuale të punës. Bëhet fjalë për një pjesë të pagave që futbollisti pretendon se nuk i ka marrë.
Padia është regjistruar më 25 nëntor në Gjykatën e Shkallës së Parë në Tiranë dhe lloji i çështjes është “padi të tjera kontraktuale”, e bazuar ligjërisht në nenin 476495 dhe në objekt konkretisht shkruhet “Detyrimin e palës së paditur të përmbushë detyrimin kontraktor në vlerën e 2.080.000 (dy milionë e tetëdhjetë mijë) lekë për llogari të palës paditëse, si pasojë e mosrespektimit të kontratës individuale të punës të datës 11062012”. Vlen të përmendet se në sezonet që sulmuesi ka luajtur në kryeqytet, klubi administrohej prej Bashkisë Tiranë. Kanë qenë pikërisht kjo kohë që u ka kushtuar ndjeshëm bardhebluve, ndërsa një mori lojtarësh iu drejtuan DHZKsë dhe fituan çështjet e tyre për probleme pagash. Çota u aktivizua në këto dy vite në 44 ndeshje, duke shënuar 7 gola në total.
