Tre infermiere dhe një sanitare në spitalin “Shefqet Ndroqi”, i cili tashmë është kthyer në Covid-2, kanë dalë ditën e sotme përpara gjykatës, pas komunikimeve që janë zbuluar mes tyre dhe Tire Alldervishit.
Prokuroria ka kërkuar arrest me burg për 4 të arrestuarat, teksa asnjë prej avokatëve mbrojtës së të akuzuarave nuk e kanë pranuar, duke dhënë mundësinë e masës së sigurisë arrest shëtpia.
Avokati i sanitares Rukije Hoxha është shprehur se sanitarja nuk ka patur asnjë komunikim me Tire Alldervishin, teksa sipas tij e akuzuara s’ka kryer asnjë veprim penal.
“Përgjegjësia penale është individuale. Prokurori duhet të kishte theksuar se cili është rreziku i ikjes dhe per këtë arsye urdhrat e ndalimit janë të paligjshme. Rukije Hoxha nuk ka asnjë komunikim me Tire Alldervishin, por përmendet tangent nga persona të tjerë. Për këtë arsye klientja ime s’ka kryer asnje vepër penale. Rukija nuk ka asnjë komunikim me askënd dhe nuk mund t’i atribuohet klientes time kjo gjë. Rukija na e ka pohuar edhe neve që nuk ka asnjë bisedë me Tiren. Ajo është nënë e 3 vajzave. Klientia ime është në një gjendje të shokuar. Unë e konsideroj të paligjshëm urdhrin e ndalimit dhe kërkoj të hetohet e lirë. Thanë që telefonat nuk lejohen, pse nuk janë të proceduar drejtuesit e spitalit?”- mësohet të jetë shprehur në sallën e gjyqit avokati i sanitares së arrestuar.
Gjithashtu sanitarja është shprehur në fjalën e saj se Tire Alldervishi, nuk mund ta bëjë shoqe me veten për atë veprim që ka kryer.
“Tirja s’mund të më bëjë shoqe me veten.”
Ndër të tjera, trupi gjykues, i Gjykatës Penale të Tiranës u ka kërkuar 3 infermiereve të arrestuara të tregojnë se cila prej tyre e ka patur për detyrë t’i shërbente nënës së denoncueses, që ndërrojë jetë në ambientet e spitalit.
Asnjëra prej infermiereve nuk e ka marrë përsipër përgjegjësinë.
“Nuk kam qenë fare.”– është shprehur Sidorela Çela.
“Nuk kam pas lidhje .”- mësohet të ketë thënë Sheqerije Koçi.
“Nuk ndodhem në katin e dytë, por në katin e tretë dhe as nuk e njoh fare zonjën Liljana. “- ka thënë Mira Bushi./Opinion.al
