Një grup qytetarësh janë mbledhur këtë të dielë në një manifestim para drejtorisë së Policisë së Tiranës në mbështetje të dy motrave Mirela dhe Albina Ruko të cilat u dhunuan një ditë më parë në Tiranë nga 30-vjeçari Denis Telo. Ngjarja u denoncua nga Opinion.al, si dhe u transmetuan edhe pamjet e konfliktit fizik. Vajzat po ecnin në trotuar në Rrugën e Bogdanëve dje në mes të ditës, kur u qëlluan me grushte nga Denis Telo. Ky i fundit rezulton të jetë i përfshirë edhe herë të tjera në sulme të tilla ndaj vajzave.
Ndërkohë një ditë pas sulmit, në protestën e zhvilluar sot, motrat Ruko në një deklaratë për mediat thanë se edhe pse kishte 8 kallëzime penale ndaj tij, Denisi vazhdimisht ishte lënë i lirë. Sipas tyre në qeli duhet të jetë jo vetëm ai por dhe ata që e kanë liruar.
“Ata e lanë të lirë Denisin që ai të na dhunonte Akoma më shumë. A do mbani përgjegjësi ju dhe këtu të ketë hetim për atë që ka ndodhur. Sepse kjo është e qartë dhe e dukshme. Unë e kam për gjykatën dhe ata që kanë firmosur lirim e tij. A është më i fortë miku se ligji. Në qeli nuk duhet të rrijë vetëm Denisi por ai që e liroi atë. Liria është e jona dhe nuk ia lëmë të na e marrë Denisi. Ngjarja është e pazakontë të dhunohesh nga një i panjohur. Kishte 8 kallëzime për këtë rast dhe personi ishte Akoma i lirë.
Nuk e kuptoj si mund të lihet i lirë një person që është dhunues. Ka vajza të tjera që janë dhunuar nga Denisi në rrugët e qytetit. Denisi nuk është i vetmi por ky është rast flagrant. Ne kërkojmë të bëhet hetim se kush e ka liruar Denisi që ai të lihet i lirë pas tetë kallëzimeve në polici. Ai është një dhunues serial. Lëviz këtu ku jemi ne dhe ka edhe shtëpinë e vet. Ne kërkojmë të merren masa. Denisi nuk mund të jetë i lirë dhe të lëvizë në qytet. Edhe vajza dhe gra të tjera do jenë më të pasigurta. Ishte një moment shokues. Në jetën time nuk ka marrë asnjë shuplakë nga askush përveç policisë së shtetit në protesta. Nuk ka as hetim ndaj këtij personi’, tha njëra prej motrave.
Ndërsa tjetra u shpreh:“Kemi përjetuar të njëjtin rast. Dhuna ka qenë e pajustifikuar. Institucionet janë fajtore për rastin e Denisit. Ke me dhjetëra të tjerë në rrugët e Tiranës që bëjnë të njëjtën sjellje. Duket se është tendecioze sigurish sidomos ndaj vajzave, Nëse nuk merren masa do të ketë protesta të tjera. Kemi rënë në kontakt me vajza të tjera që janë dhunuar nga Denisi. Nuk e lëmë që ky rast të kalojë në heshtje”, tha ajo./Opinion.al
